Dah dokek nak puaso kosennyo.. Dedolu, maso arwah omak ado laei, bilo dah dedokek nak ghayo mesti omak mengelamei. Kelamei ko memang selalu omak buek bebeghapo haghi laei nak ghayo, sobob kelamei ko tahen lamo. Indo bak lomang ndoh.. Sebolom to, poei la mencaghi buloh dokek dalom uten. Nak tau tang mencaghi buloh kelamei to.. Indo buleh sebaghang buloh ndoh.. Buloh kelamei ko, toba. Ghuehnyo pepanjang. Lopeh to, nak dikupeh pulo kulik buloh to, sampei nampak bebayang tangen kito, bilo ditengokke buloh to dokek cahayo matohaghi. Udah ito, di basuh buloh to. Lopeh siop buloh2 to tadin, baghulah dimasukke bancuhen kelamei. Nak membakar nyo pulo.. Ondeikk!! berjom2.. ado la dalom lapen jom kuak.. Bak kato arwah omak, awak dolu terbakar, baghu masak kelamei to. Kelamei ko, sampei abih ghayo pun tahen laei. M'e kogheh, dikukuih, lopeh to maken dengan niwo (bak mano tang mengejo nyo ko??) ataupun a.k.a KELAPA. Tapi sebonarnyo, ako ko bukenla penggoma kelamei. Buleh la maken, tapi indo la suko amek. Bak dodol yo la, ako buken suko amek. Setakek meghaso to, buleh la. Tapi itola, mungkin disobobken ako tak beghapo goma maken kelamei ko, ako tak berminet langsung nak belaja cagho2 membueknyo. Memang sayang, sobob buken semuo oghang dapek peluang nak belaja buek kelamei ko. Bilo dah ado peluang dolu, indo ondak.. Tapi kakak ako sompek belaja. Tapi macom mano pun, kalau ghaso teghingin amek nak maken kelamei to, kinin buleh la diboli sang. Ado sang oghang menjua nyo. Indo la payah membakar dighi laei semato-mato nak meghaso kelamei..
Ambik Nombo Dolu
 | |
  | |
6 ulasan:
Kelamai ko gelamai?
'gelamai' tu, yg sebetulnye.. tp kitorg kat rmh, ckp 'kelamai'
Salam ramadan al mubarak
"Bak mano tang kuak ?
Indo ku tau lek !
salam untok kao lady libra. bilo kao bercerito pasal kelamai baru aku pun teraso aku ni anak Rao.Susah nak dapek genari.
Dh lamo indo meraso kelamei ni..urang tuo2 dah indo ado lae..yang mudo2 dah indo tau bak mano nak membueknyo..sayang keh ilang lah nanti satu dari budayo kito..budayo membuek, membakar kelamei..maken kelamei. Memang unik bondo ni..tompek laen indo ke bejumpo.
Klamei ko, Glamei ko, raso ko, samo yuo tang lek, yo ndo? me disobouik sohari hari ndo te ngotoih bezo urop K samo G to nyo. Ondeik sodieh lek bakkare ramei yang ndo tau buek klamei ko, ako ko ndo goma sangek klamei ko tapi tiop rayo, meisti diboli yuo sobob kuargo awak suko, urang datang borayo goma yuo klamei ko, heren deko, patuik ako tuen rumah te saduongnyo suko klamei iko tapi mo ndo tobaliek pulo pek ei, ahhaha. Palieng mustahak bakkare saduong kilen yang moghroti buek klamei, elok te dituronken elmu to ke urang mudo, kalo ndo ondak, dipakso, bia kanga. Jangen ilang klamei ko tawon tawon dopen lek.
Catat Ulasan