Sahabet atao Kawen

Kadang-kadang kito indo mengonal mano tang kawen, mano tang sahabet (abet).. Kawen, idak semestinyo bulieh menjadi sahabet.  Tapi sahabet, udah tontu-tontu bulieh menjadi kawen.  Pohomnyo kilen kuak yo?

Sesetongah kawen, kadang-kadang ondak bekawen dongen kito besobob atoupun maso sonang sang.  Sesetongah kawen, kadang-kadang muncul bilo dio perolu/ondak key khidmet kito.  Sesetongah kawen ko kadang-kadang dopen kito lain, belakang kito lain.  Sesetongah kawen, kadang-kadang bilo kito seronok, dio dongki, bilo kito sodieh, dio seronok. Sesetongah kawen pulo, kadang-kadang bak biskut.  Kojop ado, kojop ilang.

Bebezo dongen sahabet.  Sahabet ko, susah sonang, sentiaso dongen kito.  Sahabet sentiaso ado bilo kito perolu/ondak key khidmet dio.  Sahabet, idak ponah berpuro-puro dongen kito.  Mey suko atou indo suko, dio aken bertoroih torang dongen kito.  Sahabet, bilo kito seronok, dio belobieh-lobieh lage seronok.  Bilo kito sodieh, dio pulo terlobieh-lobieh sodieh.  Sahabet, sentiaso ado, menyokong kito.

Dolu ako idak konal mano kawen, mano sahabet.  Dolu ako ramei KAWEN.  Idak ponah soriek.  Ilang satu kawen, cari kawen lain.  Bak ito lah.  Ponah konu tikom belakang. Tapi totop yuo kawen yang ako cari.  Sobob apo? Sobob sahabet ko memanggggg payaaahhh nak jumpo.  Satu dalom seribu.  Malah, kinin ko, dalom dunio sekarang ko, indo keterlaluen kalao ako kato key, sahabet ko, satu dalom sejuta pun, payah nak jumpo.

Lamu-lamu, ako sodar.  Indo key iyo ndoh.  Elok tey indo bekawen laei daripado mendapek kawen yang merusak key.  Elok tey indo bekawen laei daripado dapek kawen yang menyakik key ati. Elok tey indo bekawen laei daripado dapek kawen yang maken kawen.

Kadang-kadang, sensurang lobieh amen....